عميلك يفتح جواله أكثر من ما يفتح المتصفح، والأيقونة اللي على شاشته أقرب له من رابط يدوّر عليه كل مرة. عشان كذا كثير من أصحاب المتاجر يبحثون عن «تحويل الرابط إلى تطبيق». بس التحويل مو طريقة وحدة، وكل طريقة لها نتيجة مختلفة. في هالمقالة نشرح لك الطرق الثلاث، ووش تتأكد منه قبل ما تختار.
وش يعني تحويل الرابط إلى تطبيق؟
يعني إن متجرك اللي يشتغل الحين من رابط في المتصفح يصير له أيقونة على جوال العميل، يفتحها ويتسوّق منها مباشرة. الفرق بين الطرق هو: هل هالأيقونة مجرد اختصار للموقع، أو تطبيق فعلي في Google Play وApp Store بتجربة تطبيق؟
الطريقة الأولى: تطبيق ويب تقدمي (PWA)
موقعك نفسه يتجهّز بحيث العميل يقدر يضيفه لشاشة جواله من المتصفح، ويفتح كأنه تطبيق. ميزتها إنها سريعة وما تحتاج نشر في متاجر التطبيقات. بس العميل ما راح يلقاها لو بحث عن متجرك في App Store أو Google Play، ولازم هو يضيفها بنفسه.
الطريقة الثانية: تطبيق يغلّف الموقع (WebView)
تطبيق ينّشر في متاجر التطبيقات، لكن من جوّا يعرض موقعك نفسه. هذي غالبًا الطريقة اللي تستخدمها أدوات «التحويل السريع». المشكلة إن أبل ترفض التطبيقات اللي تكون مجرد موقع مغلّف، حسب البند 4.2 من إرشادات مراجعة App Store (Minimum Functionality). عشان ينقبل، لازم يقدّم شي أكثر من الموقع: تنقل زي التطبيقات، وإشعارات، وشاشة فتح بهويتك، ورسالة واضحة لو انقطع النت.
الطريقة الثالثة: تطبيق مربوط بمتجرك بتجربة تطبيق فعلية
تطبيق متصمم للجوال من البداية: بحث وفلترة وسلة ودفع وتتبع طلب، ومربوط بمتجرك بحيث أي منتج تضيفه ينعكس في التطبيق تلقائيًا. هذي الطريقة تاخذ شغل أكثر، بس هي اللي تعطي عميلك تجربة تطبيق حقيقية مو نسخة مصغّرة من الموقع.
| PWA | تغليف الموقع (WebView) | تطبيق مربوط بالمتجر | |
|---|---|---|---|
| ينّشر في App Store وGoogle Play | لا | نعم، مع احتمال رفض من أبل | نعم |
| التجربة | نفس الموقع | نفس الموقع داخل تطبيق | تجربة تطبيق متصممة للجوال |
| المجهود | الأقل | متوسط | الأكثر |
هل التحويل المجاني يكفي؟
أدوات التحويل المجاني أغلبها تمشي على الطريقة الثانية. قبل ما تستخدم أي أداة، اسأل: باسم مين ينّشر التطبيق؟ هل فيه شعار الأداة داخل تطبيقك؟ ومين يتابع التحديثات لو أبل أو قوقل غيّروا شروطهم؟
لو متجرك على سلة
سلة عندها خدمة اسمها «صانع التطبيقات» لعمل تطبيق خاص للمتجر. راجع تفاصيلها وشروطها من مركز مساعدة سلة أو لوحة تحكم متجرك، وقارنها باللي تحتاجه فعليًا.
وش تتأكد منه قبل ما تختار؟
- منتجاتك تتحدّث في التطبيق تلقائيًا من الموقع؟
- الدفع وتتبع الطلب شغالين داخل التطبيق؟
- التطبيق بهوية علامتك التجارية وألوانها؟
- يشتغل على الجوال والجهاز اللوحي بدون مشاكل؟
- انختبرت سرعته وواجهته قبل الإطلاق؟
كيف نشتغل في سطوع؟
نبدأ بمراجعة موقعك وتحليل تجربة عميلك، بعدين نصمم التطبيق بهوية علامتك، ونجهّز البحث والفلترة والسلة والدفع والتتبع، ونربطه بموقعك عشان المنتجات تتحدّث تلقائيًا، ونختبر كل شي قبل الإطلاق. تفاصيل أكثر في خدمة تحويل الموقع إلى تطبيق جوال.
أسئلة شائعة
هل أقدر أحوّل رابط متجري لتطبيق مجانًا؟
فيه أدوات مجانية، أغلبها تغلّف الموقع بتطبيق. راجع شروطها قبل، خصوصًا النشر في App Store.
ليش أبل ممكن ترفض تطبيق متجري؟
لأن إرشاداتها (البند 4.2) تطلب إن التطبيق يقدّم أكثر من موقع معاد تغليفه.
هل أحتاج أرفع منتجاتي مرتين؟
لا، لو التطبيق مربوط بالمتجر، المنتجات تنعكس فيه تلقائيًا.
