متجرك ممكن يكون حلو بالشكل، بس العميل يتعب وهو يدوّر أو يختار أو يدفع، فيطلع قبل ما يكمّل. هذي مشكلة تجربة مستخدم، مو مشكلة تصميم. في هالمقالة قائمة فحص تقدر تمشي عليها في متجرك على سلة أو زد اليوم.
وش يعني تجربة المستخدم؟ ووش الفرق بين UX وUI؟
UI (واجهة المستخدم) هي اللي يشوفه العميل: الألوان والأزرار والخطوط. UX (تجربة المستخدم) هي إحساسه وهو يستخدم المتجر: هل لقى اللي يبغاه بسرعة؟ هل فهم السعر النهائي؟ هل الدفع كان سهل؟ ممكن يكون المتجر حلو (UI قوية) والتجربة متعبة (UX ضعيفة).
ليش تبدأ بالجوال؟
حسب مقياس Baymard لتجربة صفحات المنتج (أكثر من 30,000 تقييم على أكثر من 155 موقع)، 62% من مواقع الجوال تجربتها متوسطة أو أسوأ، مقابل 52% على سطح المكتب. يعني الجوال هو المكان اللي غالبًا فيه مشاكل أكثر. افتح متجرك من جوالك واشترِ منتج كأنك عميل جديد، واكتب كل مكان وقفت فيه.
صفحة المنتج: أهم صفحة في متجرك
| افحص | ليش مهم |
|---|---|
| المبلغ النهائي (مع الشحن) ظاهر قريب من زر الشراء | 67% من المواقع اللي قاستها Baymard ما تسوّيه |
| رابط سياسة الاسترجاع موجود في صفحة المنتج | 60% من المتسوقين في استبيان Baymard يدوّرون عليها هناك، و44% من المواقع ما تحطه |
| صور توضح مقاس المنتج الحقيقي | 42% من المستخدمين يحكمون على المقاس من الصور، و37% من المواقع ما تعرض صورة توضح الحجم |
| اختيار المقاس أو اللون بأزرار ظاهرة، مو قائمة منسدلة | 57% من المواقع تخفيها في قائمة |
| الرد على التقييمات السلبية | 89% من المواقع ما ترد |
المصدر: Baymard — Current State of Product Page UX
السلة والدفع: خلّها قصيرة
متوسط عدد خانات الدفع في المتاجر 11.3 خانة (2024)، بينما Baymard تقول إن أغلب المتاجر تحتاج 8 خانات بس. كل خانة زيادة هي سبب زيادة للعميل عشان يوقف (المصدر).
- راجع الخانات الإلزامية في صفحة الدفع: وش اللي تحتاجه فعلًا عشان توصّل الطلب؟
- خل العميل يشتري بدون ما يسوّي حساب لو متجرك يسمح بكذا.
- اعرض طرق الدفع المتاحة من بدري، مو في آخر خطوة.
البحث والتصنيفات
- جرّب تبحث عن منتج باسمه الشائع مو بالاسم اللي كتبته أنت، وشوف هل يطلع.
- أسماء التصنيفات بلغة العميل، مو بلغة المستودع.
في سلة وزد
جزء كبير من التجربة يحدده الثيم اللي اخترته وإعدادات متجرك. قبل ما تغيّر الثيم كله، راجع إعدادات صفحة المنتج والشحن والدفع في لوحة التحكم، وقارنها بالقائمة اللي فوق.
كيف نشتغل في سطوع؟
نشتغل على متجرك من أول كبسة زر لآخر خطوة دفع: نفهم منك مشروعك ومين عميلك ووش تبغى توصّل له، وبعدين نبني واجهة تشرح رسالتك بدون فلسفة، ونرتّب خطوات الشراء. تفاصيل أكثر في خدمة تحسين تجربة المستخدم (UI/UX).
أسئلة شائعة
هل أحتاج أغيّر تصميم متجري كله عشان أحسّن التجربة؟
لا، أغلب التحسينات في تفاصيل: وضوح السعر، والخانات، ومكان المعلومات.
من وين أبدأ؟
من صفحة المنتج على الجوال، لأنها المكان اللي العميل يقرر فيه.
وش الفرق بين تحسين التجربة وCRO؟
تحسين التجربة يخلي المتجر أسهل في الاستخدام، وCRO يقيس وش اللي فعلًا رفع نسبة الشراء. اقرأ أكثر في وش يعني CRO؟
للمبادئ العامة وأساسيات الموضوع، شوف مقالنا عن تحسين تجربة المستخدم.
